24 episodar.

«Two and a Half Men» har stort sett fått godord fortalt om seg frå folk eg kjenner og frå mine vante, amerikanske nettsider om tv. Så til slutt måtte eg, styrt av nysgjerrigheita, strekke meg til å sjå kva denne populære sitcomen dreia seg om.

Som seriens viktigaste karakterar har me Charlie, broren Alan og Alans son Jake. Charlie lever av å lage reklamejingles og eig eit flott hus ved stranda i Malibu, når Alan får ekteskapstrøbbel flyttar han inn og har halvt med seg sonen i bagasjen som fast helgeinventar.

Seriens morsomme augeblikk står på Charlie sin avslappa og kule holdning til livet, han er single, player og verdens kulaste onkel for Jake. Alan, på mange måtar den strake motsetninga, men også ein fleksibel karakter, er fornuftens knytepunkt, men langt i frå perfekt han heller. Til slutt er det Jake, 10 år gammal, akkurat passe smart på enkelte område og for ung til å forstå alt, grunnlaget for mange morsomme scener dette og.

Det er ikkje til å legge skjul på at «Two and a Half Men» bevegar seg smått innpå familiekomediens område, slik er det ofte med barn i ein serie, det er visse ting som virka å vere pensum på det område. Men serien blir aldri ei moralpreiken, vektlegginga av dette i forhold til den drøye humoren, men likevel innanfor amerikanske tv-sensurs rammer, er liten nok til at dette først og fremst er ein vaksen sitcom det er snakk om. Det er vaksne som vil få mest glede av det grove språket, dei ufullstendige seksuelt lada setningane der kjerneordet blir overlete til publikum, osv.

Det tok kanskje litt for mange episodar før eg blei engasjert, ingen var direkte dårlege i løpet av seriens første få episodar, ingen gav full uttelling. Noko slikt kan vitne om at serien, i det minste innleiingsvis, er prega av heller middels gode vitsar, men karakterane veks på ein etter kvart. Og samanlikna med veldig mange andre komediar kjem denne sterkt ut til slutt. Eit stykke utover i første sesongen fall uansett fleire av vitsane på plass, så for framtida (som alt har vore i drift opp til 5. sesong per dags dato) lovar dette godt.